من اجندتي 1 : :)))

اجندتي اللي بدأت اكتب فيها من كام شهر تقريبا ... خلصت
دي تاني واحدة تخلص ! ... وبدأت اكتب في الاجندة رقم 3
الكتابة خلتني اكتشف حاجات مكنتش شايفاها

زي مثلا : اعتقد كلكم عارفين ان كل الستات رغايين ... بس انا فعلا مش رغاية .... اه ساعات بتكلم كتير بس مش علي طول ... و يمكن ده بيضايق صحابي مني لان عندي قدرة افضل قاعدة ساكتة مدة طويلة اوي او متصلش بالتليفون الا كل فين و فين ....مش عشان انا ناسياهم وللا مش عايزة اكلمهم ... انما انا فعلا مش من طبعي اتكلم كتير...بس لما بكلمهم بعد مدة كبيرة بنرغي كتير اوي ...صح؟
;)
:D
بس من ساعة ما بدأت اكتب في اجندة و انا بكتب كمية كلام غير عادي ! و ده اللي خلاني مؤخرا اعترف لنفسي اني رغاية زي كل بنات الدنيا .... بس علي الورق و بس
:D

V
V
V

دولابي

دولابي هو اكتر قطعة اثاث بحبها في شقتنا .... ليه ؟
هحكيلكم
^_^
احنا نقلنا من كام سنة كده للشقة اللي احنا قاعدين فيها دلوقتي ....
و لما جينا كان لسة فاضل حاجات في الشقة مكملتش
و من ضمنها دولابي....
كان كل ما يجي عليا الدور في اني اشتريه تطلع حاجات تانية اهم في الشقة
فنقول خلاص مش مشكلة يستني الدولاب ....
قعدت سنة كاملة هدومي متفرقة علي دواليب القبائل المجاورة
قبيلة اخواتي
و قبيلة ماما وبابا
و الجزء الاهم من هدومي كان في شنطة سفر عندي
اما الطرح و الشنط في اكياس تحت المكتب و الباقي تحت السرير ...
طبعا البنات هيفهموني لما اقولهم يعني ايه هدومك تبقي " متكعمشة" في شنطة سفر
وانتي عايزة تنزلي تروحي الكلية مثلا او جالك مشوار مفاجئ
او مامتك عايزاكي تنزلي تشتري لها حاجة من تحت دلوقتي حالا
!
علي الاقل هتكوي 3 قطع ملابس
ولازم تخلصي في وقت قياسي....
ونلاحظ ان الهدوم اصلا فوق بعضها الشتوي ع الصيفي
هدوم البيت علي هدوم الخروج
و ده لأي بنت = وضع لا يمكن السكوت عنه
فبابا حبيبي الله يكرمه فكر و قرر و اشتري لي دولاب
بس دولاب ايه بقي ....تيك اواي
^_^
لحد ما يجي الدور عليا في دولاب بجد
وقتها كانت فرحتي بيه متتوصفش ...
الدولاب التيك اواي لمن لا يعرف ... هو عبارة عن سيور معدنية يتم تركيبها
ليصبح عندك هيكل الدولاب ثم يغطي من الخارج بقطعة قماش ملونة
فيصبح عندك دولاب جاهز للاستخدام في اقل من 20 دقيقة تركيب
:D

اهو كان نفس الفكرة دي

بصراحة عجبني بجد
عملي جدا
خفيف جدا
الوانه كانت ( ر و ش ة ) اووووي
كان مووووووووف يا جماعة موف ...تخيلوا
:P
مساحته كانت كافية بالنسبة لي - اكيد ارحم من شنطة السفر ! - و الاهم
بيتغسل في الغسالة
:D
وكان سهل النقل فكنت بغير مكان الحاجات في الاوضة بسهولة جداااا في اي وقت

يس عيبه الاولاني انه كان قصير ....
وانا طويلة ...
قصدي يعني ان هدومي طويلة
:DD
لما كنت بعلق الفساتين و العبايات كان نصها اللي تحت بيتكسر ....
بس ده هيجي ايه جنب " الكعمشة" الحمد لله احنا كنا فيييييييين وبقينا فين

دولابي رحمني من اللف في كل الاوض عشان ادور علي حاجتي
و رحمني من شنطة السفر
و الاهم عرفت احط طرحي في مكان آدمي
لاني طبعا رفعتها من تحت المكتب واتعلقت في الدولاب
وده في حد ذاته انجاااااز
:D

و مرت الايام و الاسابيع
و دارت فصول السنة
و مع الوقت بدأت الاحظ علي دولابي اعراض غريبة
اصحي الاقيه بعيد عن الحيطة بميل غريب
عملت ابحاثي و حصرت توقعاتي
و لما خلعت القماش من عليه اكتشفت المشكلة
و لما ربطت السيور بحبل بقي تمام ....
كام اسبوع كده و هوووب رجع تاني
فنقلته في كورنر عشان يفضل واقف ثابت و الحيطة تسنده ...
مهو مش معقول اقف اسنده انا يعني ! و قمت خففت هدومي من جواه شوية قلت اساعد في حل ازمته مهو ياما ساعدني
و مشيت حياتي معاه في سلام و سعادة

و جت امتحانات البكالريوس وانا كنت خلاص اتعودت علي وجوده
بل واصبح جزء لا يتجزأ مني انا شخصيا ....
وهو احتل كورنر في مكان استراتيجي في الاوضة
لحد ما جه اليوم المشئوم
قاعدة علي مكتبي و ضهري للاوضة كلها و فجأة سمعت صوت غريب ...
افتكرت حاجة وقعت في البلكونة او حاجة اتكسرت برة ....
بس الصوت راح و متكررش
قلت يبقي مش عندنا ...
شوية و الصوت اتكرر تاني قلت مبدهاش بقي هروح اشوف فيه ايه ....
لسة بقوم من ع المكتب ....
طرااااااااخ
ايه؟؟
لا لا مش انا اللي وقعت يا اشرار انتوا ...
:D
:P
الدولاب
الدولاب هو اللي وقع
وقع و سد عليا الباب واتحبست
:S
:D
وكان التصرف الوحيد اللي اقدر اعمله وانا شايفاه ممد قدامي ع الارض اني
اعمل له
CPR
:D
قصدي افضيه
افضيه من الهدوم اللي جواه عشان اقدر احركه هو نفسه ....
وطبعا يتحرق امتحان الكيميا البحرية علي التلوث المائي
ركزت في تحرير نفسي من الاسر ....
عشان اقدر اتصرف و كل همي اشوف هو وقع ليه ؟
الاستاذ بعد ما فضيته اكتشفت ....
ان السيور المعدن بتاعته
" اتلوت" -
"باظت"-
" اتنت"
و ده معناه انها مستحملتش ضغط هدومي جواه
ولا هتستحمل حتي طرحة واحدة جواه بعد كده
انتحرت يا دولابي العزيز
:((وهنا بس عرفت العيب التاني في دولابي : انه كان
made in china
:DDDD

و طبعا كانت هي دي اللحظة الحاسمة اللي خلت موضوع شراء دولاب ل مي اولوية
و فعلا حصل و تم شراء دولاب ...وكان بالظبط زي ما تخيلته من ساعة ما دخلت الاوضة دي
هو
بخشبه
و مفصلاته
و .....
لا مش هقول ببابا غنوجه لأ
:P
اخيرا
اخيرا يا جماعة
دولاب من خشب و مفصلات
اخيرا دولاب اقدر اعلق حاجاتي فيه بالترتيب زي ما بحب
و كمان من غير ما الهدوم تتكسر
دولاب فيه دور فوق ... بلاكار اشيل فيه
هدومي الشتوي في الصيف
و هدومي الصيفي في الشتا
اخيرا و بعد صبر اكتر من سنة و نص اصبح عندي دولاب ينفع اتسند عليه
:DD




اخيرا و بعد صبر اكتر من سنة و نص اصبح عندي دولاب ينفع اتسند عليه


و جه العمال نقلوه و ركبوه وانا واقفة اتابع هذا الحدث النادر الذي طال انتظاره .... وتمت المهمة

ولما صحيت من النوم بقي

لأ لأ اوعوا تمشوا .....انا مكنتش بحلم ده بجد
:D
لما صحيت تاني يوم الصبح كان دولابي الخشب هو اول حاجة اشوفها ...
عارفين لما تحصل حاجة تكونوا لسة مش قادرين تستوعبوها
فتاخدوا لحظات كده و بعدين يطلع رد الفعل فجأة
!
اهو ده اللي حصل معايا اول ما صحيت ... نسيت انه الدولاب اتركب خلاص
:D
وعمالة اقول ايه ده ايه بالتاع ده جه منين
!!!
بس لما استوعبت الموقف
بجد حسيت جوايا باحساس راااائع ....
مش عارفة ...حسيت كأني طفلة صاحية يوم العيد الصبح



والله بجد مش ببالغ ...فاكرين الاحساس ده ؟وللا نسيتوه؟
لما تفضل تسأل مامتك امتي العيد هيجي فتقولك بعد بكرة ...تسألها بكرة ...تقولك بكرة ....وتصحي بقي يوم العيد الصبح ...ها يا ماما العيد جه ...تقولك اه يا حبيبي ... تلاقي نفسك بتسأل : هو فين يا ماما؟
0_0
وتكتشف انك استحالة تشوف العيد انما ممحكن بس تحس بيه
!

اهو انا بقي لما صحيت يومها حسيت اني الطفلة الوحيدة اللي شافت اجابة السؤال ده
بس طفلة ...كبيرة حبتين تلاتة اربعة
^_^


يومها عرفت يعني ايه انك تصبر و تستني
و ربنا هيدبر كل حاجة و هتمشي زي ما انت عايز واحسن

عرفتوا ليه بحب دولابي و بحكيلكم عليه؟
عشان هو اول من علمني
الصبر و الحمد
علمني اني اصبر علي كل شئ ربنا قدره في حياتي ....
و احمده علي كل كبيرة و صغيرة اخدها مني او زرقني بيها في حياتي
^_^
دولابي خلاني احس قد ايه نعمة ربنا عليا كبيرة اوي اوي
و انه فيه حاجات كنت شايفاها بديهية بس هي نعم كبيرة لازم نقدرها
انه رزقني هدوم و غيري مش لاقي
و رزقني سرير و غيري بينام ع الارض
و رزقني بادوات ارتب فيها حاجاتي عشان اقدر ارتب حياتي و غيري مشتت
و رزقني سكن وغيري حيران من مكان لمكان
و و و و وو و وو
حاجات كتيييير اوي يا رب اعجزتني بيها عن حسن حمدك و كفاية شكرك


انا عارفة انه يمكن فيه ناس الدولاب عندهم ده حاجة من الكماليات
بس شوية الخشب علي مسامير دول ....فتحوا عنيا علي نعم يمكن مكنتش واخدة بالي منها قبل كده
و ساعدني كتير استوعب حاجات و مواقف حصلت بعدين

شكرا دولابي

و لك كل الحمد يا من وهبتني اياه....
لك كل الحمد يا من احسنت الينا في لطيف النعم و في اكبرها....
لك كل الحمد حتي ترضي ...ولك كل الحمد بعد الرضي




شكرا دولابي