جربت قبل كده تبقي ماشي في الشارع ونفسك تقابل حد تعرفه ... وتقابله فعلا؟
جربت تبقي نفسك تاكل حاجة معينة مثلا واول ما تروح البيت تلاقي ريحتها مالية الشارع كله وتكتشف في الاخر ان الريحة دي جاية من بيتكم؟
جربت لما تبقي تعبان اوي اوي ونفسك الشغل يتلغي النهاردة او ان السيكشن تقدر تعوضه في يوم تاني ....و تقوم تلبس وتنزل وانت كاره نفسك ولما توصل تكتشف ان النهاردة اجازة رسمي بس انت مسمعتش المعلومة دي في الاخبار امبارح؟
جربت لما تدعي بحاجة من قلبك بجد ...و تحصل فعلا او علي الاقل توصلك بيها اشارة ؟
جربت ان حد يكلمك وهو فاكر انه فاهم كل حاجة ... فانت تسيبه يقول كل اللي عنده و تخليه يعتقد انه فاهم صح مع انه مش فاهم غير اللي هو عايز يفهمه ؟
جربت لما تبقي عارف ان الحاجة اللي انت عايزها هتحصل بس حاسس من جواك ان ممكن متحصلش .... بس بتحصل في الاخر؟
جربت لما يجي علي بالك فيلم او اغنية معينة وفجأة تغير القناة تلاقيها شغالة ؟
جربت لما يبقي نفسك تكلم حد تشكيله من هم و ضيق عندك وتلاقيه جايلك وبيشتكيلك من نفس مشكلتك ؟
جربت لما تسعي عشان تنفذ حاجة في دماغك ....بس متحصلش ...وتبقي زعلان ...بعدها علي طول تلاقي حاجة احلي يجي بمليون مرة حصلتلك فتحس قد ايه الانسان ده كائن ضعيف ومش عارف حاجة بجد؟
جربت لما تنزل تمشي في الشارع علي غير هدي ...و تلاقي نفسك وصلت للمكان كان نفسك تروحه من زمان؟
جربت تحط نفسك مكان حد تاني تعرفه وتشوف نفسك هتتصرف زيه وللا بطريقة مختلفة في المواقف اللي بتقابلك ؟
جربت لما تلاقي حد بينفذ او بيقولك الفكرة اللي بقالها يومين تلاتة شاغلة دماغك وانت متكلمتش مع اي حد فيها ولا حتي مع الشخص ده ؟
جربت تكتب كلام و انت عارف انه ملهوش اي معني ...بس حاسس انك لازم لازم لااااازم تكتبته؟
2 comments:
garbt 7agat kteeeeeeeer
tesad2y 7asalet
Aya Sci
:))
اه اصدق
نورتيني يا أية
Post a Comment